मुंबई: महाराष्ट्रातील शेतीला आता जागतिक तंत्रज्ञानाची जोड मिळणार आहे. राज्याचे कृषी मंत्री दत्तात्रय भरणे यांच्या उपस्थितीत आज मंत्रालयात कॅनडातील उच्चस्तरीय शिष्टमंडळासोबत एक महत्त्वाची बैठक पार पडली. या बैठकीत महाराष्ट्र आणि कॅनडा दरम्यान कृषी तंत्रज्ञान, कृत्रिम बुद्धिमत्ता (AI) आणि अन्नप्रक्रिया क्षेत्रात सहकार्य करण्यावर सकारात्मक शिक्कामोर्तब करण्यात आले.
राज्यातील कृषी क्षेत्राच्या आधुनिकीकरणासाठी राज्य सरकार आता आक्रमक झाले आहे. कृत्रिम बुद्धिमत्तेच्या मदतीने हवामानाचा अचूक अंदाज, पीक व्यवस्थापन आणि कीड नियंत्रण यांसारख्या गोष्टी शेतकऱ्यांसाठी अधिक सुलभ होणार आहेत. यामुळे नैसर्गिक आपत्तींमुळे होणारे शेतकऱ्यांचे नुकसान कमी होण्यास मोठी मदत होईल.
केवळ उत्पादन वाढवून न थांबता, शेतमालावर प्रक्रिया (Food Processing) करून त्याचे मूल्यवर्धन करण्यावर या चर्चेत भर देण्यात आला. कॅनडाच्या प्रगत पुरवठा साखळी व्यवस्थापनाचा (Supply Chain) फायदा महाराष्ट्रातील शेतकऱ्यांना मिळाल्यास, आपला शेतमाल थेट जागतिक बाजारपेठेत पोहचू शकेल.
या ऐतिहासिक चर्चेत केवळ तंत्रज्ञानच नाही, तर शिक्षणावरही भर दिला आहे. महाराष्ट्र आणि कॅनडातील कृषी विद्यापीठांदरम्यान संयुक्त संशोधन, तंत्रज्ञान देवाणघेवाण आणि विद्यार्थ्यांसाठी नवीन शैक्षणिक उपक्रम राबविण्याबाबत विचारविनिमय करण्यात आला. यामुळे कृषी क्षेत्रातील नव्या स्टार्टअप्सनाही मोठी उभारी मिळणार आहे.
या बैठकीस कृषी सचिव विकासचंद्र रस्तोगी, कृषी आयुक्त सुरज मांढरे, पोखरा प्रकल्पाचे संचालक परिमल सिंह आणि इंडो-कॅनडा चेंबर ऑफ कॉमर्सचे अध्यक्ष प्रशांत श्रीवास्तव यांच्यासह दोन्ही देशांतील तज्ज्ञ प्रतिनिधी उपस्थित होते.
"कॅनडासोबतचे हे सहकार्य महाराष्ट्राच्या ग्रामीण अर्थव्यवस्थेला बळकटी देणारे ठरेल. आधुनिक तंत्रज्ञानामुळे शेतकऱ्यांना वेळेवर मार्गदर्शन मिळून त्यांचे उत्पन्न वाढवण्यास मदत होईल." — दत्तात्रय भरणे, कृषी मंत्री, महाराष्ट्र राज्य.
Post a Comment